ఆలోచనలనేవి రెండువైపులా పదును వున్న కత్తి లాంటివి. అవి మనిషిని ఎంత ఉత్తేజపరచగలవో అంత నిరాశపరచగలవు. ఒక వ్యక్తి తన లక్ష్యాన్ని జయిస్తాడా? లేక లక్ష్యంచే జయించబడతాడా? అనే విషయాన్ని అతని ఆలోచనాసరళిని బట్టి తేలిగ్గా చెప్పవచ్చు.
జయాపజయాలనేవి కేవలం ఆలోచనా జనితాలు తప్ప బాహ్య శక్తులచే నిర్ణయించబడే దృగ్విజయాలు కావు. అసలు ఒక మనిషి విజయం సాధించడానికి కావాల్సింది ఇతరుల సహకారమో లేక పరిస్థితులు అనుకూలించడమో కాదు. నిజానికి అవి ప్రతికూలంగా పనిచేసినా అతని ఆలోచనలు సహకరిస్తే చాలు విజయం దానంతట అదే సిద్ధిస్తుంది. అందుకే ప్రపంచ చరిత్రంతా కేవలం కొద్దిమంది ఆలోచనాపరుల చరిత్రేనని భావిస్తారు. జీవితంలో ఇంత ప్రాముఖ్యం ఉన్న ఆలోచనల పట్ల చాలామంది నిర్లక్ష్యభావం వహిస్తారు. ఇలాంటివారు ఆలోచనలను సవ్యమైన రీతిలో మలచుకోవడానికి ప్రయత్నిస్తారు. ఫలితంగా వీరి యోచనా స్రవంతిలో అనవసర అంశాలే ఎక్కువగా చోటుచేసుకుంటాయి.
సగటు మనిషి తన జీవితంలో ఇంచుమించు సగభాగాన్ని అనవసర ఆలోచనాలతోనే వృధా చేస్తాడని అంచనా! ఆలోచనలు ఎంత ఉపయుక్తమైనవో, అంత ప్రమాదకరమైనవని మనోవిజ్ఞాన శాస్త్రం చెబుతుంది. అందుకే ఆలోచనాస్రవంతిని వరదనీటితో పోలుస్తారు. కట్టలువేసి వరద నీటిని జాగ్రత్తగా వినియోగించుకొంటే బీడు భూములు సుక్షేత్రాలవుతాయి. అలా వదిలేస్తే అవి మరుభూములుగా మారుతాయి. అలాగే ఆలోచనలను అదుపు చేసి సక్రమ మార్గంలో నడిపిస్తే మనోక్షేత్రం సస్యశ్యామలవుతుంది. లేకుంటే ఎడారిగా మారుతుంది. కాబట్టి ఆలోచనలను అదుపుచేయడం, అవసరాలకు అనుగుణంగా మలుచుకోవడం అవసరం.
మనం ఆలోచనలకు లొంగిపోవడంకంటే, ఆలోచనలను మనకు అనుకూలంగా మలుచుకోవడం ఉత్తమం. అనుకూలమైన ఆలోచనలంటే మన లక్ష్యానికి, చేస్తున్న కృషికి అనుగుణంగా ఉండేలా చూసుకోవడం. మనిషి తన ఆలోచనలపై పట్టు సాధించడమంటే ఇదే! ఆలోచనలను అదుపు చేసుకోగలిగిన వ్యక్తి దేనినైనా సాధించగలుగుతాడు. ఇంట గెలిస్తేనే కదా రచ్చ గెలిచేది? అయితే చాలామంది ఈ విషయాన్ని గుర్తించలేరు. లక్ష్యానికి అనుగుణంగా ఆలోచనలను మలచుకోలేకపోవడం వల్ల వీరి బాహ్యప్రవర్తనకూ, అంతర ప్రవృత్తికీ మధ్య ఎడతెగని ఘర్షణ జరుగుతుంది. ఈ విధమైన ద్వంద్వత్వంవల్ల సర్వశక్తులు లక్ష్యంపైకి కేంద్రీకరించడం కుదరదు. వ్యతిరేక ఆలోచనా స్రవంతి ప్రయత్నాన్ని అడ్డగించి, లక్ష్యాన్ని దారుణంగా నీరుగారుస్తుంది. నూటికి తొంభై మంది అభ్యర్థులు తమ లక్ష్యానికి అనుగుణంగా కృషి చేయలేకపోవడానికి ప్రధాన కారణం ఇదే.
అయితే తమ ఆలోచనాసరళిని మార్చుకోవడానికి కొన్ని ప్రయత్నాలు చేస్తే ‘మార్పు’ అనేది తనంతట తనే వస్తుంది. ముందుగా మనసుపై అదుపు సాధించడం మానవమాత్రులకు సాధ్యమయ్యేది కాదు. అది ఋషులకు మాత్రమే సాధ్యం అనే భావనను వదిలిపెట్టాలి. కృషి వుంటే మనుషులు ఋషులవుతారన్నాడో కవి. కృషి వుంటే మనిషి సాధించలేనిదంటూ ఏమీ ఉండదని గ్రహించాలి. తలచుకొంటే ఎవరైనా తమ ఆలోచనలను మార్చుకోవచ్చన్న వాస్తవాన్ని గుర్తించాలి. ఇది శాస్ర్తియంగా కూడా నిరూపణ అయింది.
ఒకరకంగా మనిషి మస్తిష్కం కూడా కంప్యూటర్ వంటిదే! దీనిలోకి ఎలాంటి ఆలోచనలు ప్రవేశపెడితే తిరిగి అలాంటి ఉత్పత్తి వస్తుంది. పుట్టిన ప్రతి మనిషి మస్తిష్కం కూడా శూన్యంతో ఇంటరాక్షన్ పెరిగిన తర్వాత కొన్ని భావాలు మనసులోకి చొరబడతాయి. క్రమంగా వివిధ భావాలమధ్య సమన్వయం ఏర్పడి స్వతంత్ర ఆలోచనా శక్తి, సృజనాత్మకత వృద్ధి చెందుతుంది. అంటే మనసులోకి ప్రవేశించిన భావాలు, ఆలోచనల మథనం నుండే సృజనాత్మకత పుడుతుందన్నమాట!
దీనిని బట్టి మనిషి అంతరంగంలోకి ప్రవేశపెట్టుకున్న భావాలు, ఆలోచనలే అతని భవిష్యత్ ఆలోచనకు, వ్యక్తిత్వానికి పునాదిరాళ్ళని తెలుస్తోంది. కాబట్టి ఆలోచనాస్రవంతిలోకి భావాలు ప్రవేశపెట్టేటప్పుడే జాగ్రత్త వహించాలి. అపసవ్య ఆలోచనాలనే వైరస్‌లను బ్రెయిన్ అనే కంప్యూటర్‌లోకి చొప్పిస్తే మొత్తం ప్రోగ్రామ్ అంతా చెడిపోతుంది.
కడివెడు పాలను విరచడానికి ఒకే ఒక్క విషబిందువు చాలు! ఏదైనా ఒక లక్ష్యం కోసం కృషిని ప్రారంభించే ముందు నాణేనికి రెండువైపులా చూడాలి. కానీ తమపై తమకు నమ్మకంలేనివారు కేవలం ఒకవైపు మాత్రమే చూస్తూ అపసవ్య ఆలోచనలు పెంపొందించుకొంటుంటారు. విజయాన్ని వాయిదా వేసే అపసవ్య ఆలోచనలను వదిలించుకోవడం కాస్త కష్టసాధ్యమే!
ఎనభైశాతం విజయం సాధించి ఇరవై శాతం అపజయం ఎదుర్కొన్నా ఆ అపజయమే మన వైఫల్యాన్ని ఎత్తిచూపి విజయాన్ని అపహాస్యం చేస్తుంది. విజయానికి చేరువలో ఉన్నామనే విషయాన్ని విస్మరించి అవాంతరానే్న తలచుకొని మదనపడతాం!
నిజమే! అపసవ్య ఆలోచనలకున్న బలం అలాంటిది. ఇవి హద్దులు మీరితే ఏ విషయాన్ని సహేతుకంగా చూడనీయవు. తలపై అనవసర భారాన్ని మోపి అంతర్గత శక్తిని వృధా చేస్తాయి. సాధారణంగా అపసవ్య ఆలోచనలన్నీ గతానికో, భవిష్యత్తుకో సంబంధించినవై ఉంటాయి. కాబట్టి వీటివల్ల వర్తమానం వృధా అవుతుంది.

• కంసుడు

ఆశావాహుల నిరీక్షణ టిడిపి కార్యాలయంలో ముఖ్యమంత్రి చంద్రబాబు నాయుడు, మంత్రులు, పార్టీ నేతలు నిర్వహిస్తున్న గ్రీవెన్స్‌ కార్యక్రమంలో నామినేటెడ్‌ ఆశావహుల దరఖాస్తులే ఎక్కువగా ఉంటున్నాయనే చర్చ టిడిపిలో జరుగుతోంది. గత ప్రభుత్వంలో ఇబ్బందులు పడ్డ కార్యకర్తలు, ప్రజల సమస్యలు పరిష్కరించేందుకు ప్రజావేదిక పేరుతో ఈ గ్రీవెన్స్‌ కార్యక్రమం మొదలుపెట్టారు. సమస్యలు చెప్పుకునేందుకు ఎంతమంది వస్తున్నారో అంతే సంఖ్యలో పదవుల కోసమూ వస్తున్నారు.
చంద్రబాబు కసరత్తు నామినేటెడ్‌ పోస్టుల కోసం చూస్తున్న ఆశావహులు తమ బయోడేటాను పార్టీ కార్యాలయంలోని ప్రోగ్రామ్స్‌ కమిటీకి అందించాలని టిడిపి అధిష్టానం నెలన్నర క్రితం ఆ పార్టీ నాయకులకు ఆదేశాలు జారీ చేసింది. దీంతో ప్రోగ్రామ్స్‌ కమిటీ నాయకుల నుంచి బయోడేటా, దరఖాస్తులు స్వీకరిస్తోంది. ప్రోగ్రామ్స్‌ కమిటీకి వచ్చిన బయోడేటాల పరిశీలన కార్యక్రమం ముఖ్యమంత్రి చంద్రబాబు, మంత్రి లోకేష్‌ ఆధ్వర్యంలోనే జరుగుతోంది. టిడిపిలో సీనియర్‌ నేతలు సైతం కార్పొరేషన్‌ ఛైర్మన్‌ పోస్టులను ఆశిస్తున్నారు. ఎన్నికల సమయంలో పొత్తులో భాగంగా టికెట్లు త్యాగం చేసిన నేతలు, ఇతర పార్టీల నుంచి వచ్చిన నేతల కోసం సీటు త్యాగం చేసిన నేతలు ఈ విభాగంలో ఉన్నారు.

పంపకాల ఫార్ములా టిడిపి కూటమిలో నామినేటెడ్‌ పదవుల పంపకాలకు ఒక ఫార్ములా సిద్దం చేసారు. టిడిపి గెలిచిన నియోజకవర్గాల్లో ఆ పార్టీకి 60 శాతం, జనసేనకు 30 శాతం, బిజెపికి 10 శాతం చొప్పున పదవులు పంపకాలు చేయాలని మూడు పార్టీలు నిర్ణయం తీసుకున్నట్లు తెలిసింది. జనసేన గెలిచిన నియోజకవర్గాల్లో జనసేనకు 60 శాతం, టిడిపికి 30 శాతం, బిజెపికి 10 శాతం చొప్పున, బిజెపి గెలిచిన నియోజకవర్గాల్లో బిజెపికి 60 శాతం, టిడిపికి 30 శాతం, జనసేనకు 10 శాతం పంపకాలు చేయాలని నిర్ణయం తీసుకున్నారు. దీంతో, పదవుల భర్తీ ఎప్పుడు ప్రారంభం అవుతుందనేది స్పష్టత రావాల్సి ఉంది.

చిత్తూరు జిల్లాలోని పలమనేరులో స్థానిక టీడీపీ ఎమ్మెల్యే, మాజీ మంత్రి ఎన్. అమరనాథ రెడ్డి ఇంటికి వెళ్లిన మాజీ సీఎం ఎన్. కిరణ్ కుమార్ రెడ్డి ఆయనతో పలు విషయాలప చర్చలు జరిపారు. అనంతపరం మీడియతో మాట్లాడిన మాజీ సీఎం కిరణ్ కుమార్ రెడ్డి గత వైసీపీ ప్రభుత్వం చేసిన ఆగడాలపై విరిచుకుపడ్డారు. గత రెండు నెలలుగా ఆంధ్రప్రదేశ్ ప్రజలు ఊపిరీ పీల్చుకుని సంతోషంగా ఉంటూ ప్రశాంతమైన జీవితాన్ని గడపాలని బావిస్తున్నారని మాజీ సీఎం కిరణ్ కుమార్ రెడ్డి అన్నారు.

త వైసీపీ పాలనలో ఎదుర్కొన్న సమస్యలు, ఇబ్బందులను ప్రజలు ఇంకా మర్చిపోలేకపోతున్నారని, రెండు నెలల నుంచి ప్రజలకు స్వేచ్చ వచ్చినట్లు అయ్యిందని, రాక్షస పాలనకు ప్రజలు చెక్ పెట్టారని మాజీ సీఎం కిరణ్ కుమార్ రెడ్డి అన్నారు. చిత్తూరు జిల్లాలో ప్రజలు అనేక ఇబ్బందులు ఎదుర్కొన్నారని, పెద్దాయన అని చెప్పుకునే ఓ మాజీ మంత్రి బాధితులు ఈ జిల్లాలో ఎక్కువగా ఉన్నారని పరోక్షంగా పెద్దిరెడ్డి రామచంద్రా రెడ్డిపై మాజీ సీఎం కిరణ్ కుమార్ రెడ్డి విరుచుకుపడ్డారు.

ఆంధ్రప్రదేశ్ రాష్ట్ర రాజధాని అమరావతి అభివృద్ధి కోసం కేంద్ర ప్రభుత్వం రూ. 15 వేల కోట్లు విడుదల చెయ్యడానికి వేగంగా పనులు మొదలైనాయని, అలాగే దేశంలోనే అతి పెద్ద ప్రాజెక్టు అయిన పోలవం ప్రాజెక్టు పనులు పూర్తి చెయ్యడానికి పూర్తిగా సహకరిస్తామని నరేంద్ర మోదీ ప్రభుత్వం ఇప్పటికే ఆంధ్రప్రదేశ్ లోని కూటమి ప్రభుత్వానికి హామీ ఇచ్చిందని, ఇక ఆంధ్రప్రదేశ్ ప్రజలకు మంచి రోజులు మొదలైనాయని మాజీ సీఎం కిరణ్ కుమార్ రెడ్డి గుర్తు చేశారు.
చంద్రబాబు ఆధ్వర్యంలో ఆంధ్రప్రదేశ్ ఎన్నడూ లేని విధంగా అభివృద్ధి చెందుతుందని అని చెప్పడంలో ఎలాంటి సందేహం లేదని, కూటమి ప్రభుత్వం ప్రజలకు మంచి పరిపాలన అందిస్తుందని మాజీ సీఎం కిరణ్ కుమార్ రెడ్డి ధీమా వ్యక్తం చేశారు. ఇదే సందర్బంలో మాజీ మంత్రి, పలమనేరు టీడీపీ ఎమ్మెల్యే ఎన్. అమరనథ రెడ్డి గత వైసీపీ ప్రభుత్వంపై తీవ్రస్థాయిలో ఆరోపణలు చేశారు. ఇదే సందర్బంలో టీడీపీ, జనసేన, బీజేపీ నాయకులు వైసీపీ నాయకులపై విమర్శలు గుప్పించారు.

ప్ర: సంవత్సర కాలంగా ఏకధాటిగా సాహిత్య కార్యక్రమాల నిర్వహణ వల్ల మీరు ఆశించిన ప్రయోజనం నెరవేరిందనుకుంటున్నారా ? మీ టీం వివరాలు చెప్పండి
జ : వెయ్యేళ్ళ తెలుగు సాహిత్యంపై మూల్యాంకనం మొదలు పెడితే 365 రోజుల్లో పూర్తయ్యే పనికాదు. మా పరిమిత దృష్టితో తెలుగు సాహిత్యంలో అన్ని ప్రక్రియలపై సింహావలోకనం చేసాం. అది చాలా సంతృప్తినిచ్చే విషయం. ఈరోజున తెలుగు సాహిత్యానికి సంబంధించి మాదగ్గరున్న డేటాబేస్ మరెక్కడా లభించే అవకాశమే లేదు. సేవ తెలుగు భాష, సాహితీ, సాంస్కృతిక సేవా సంస్థ అక్షర తోరణం శీర్షికన ఒక మహా యజ్ఞం లా ఈ కార్యక్రమాన్ని నడిపాము. కొత్త తరానికి అమూల్యమైన భాండాగారాన్ని పొందుపరిచామన్న తృప్తి కలిగింది. ఈ సంస్థ అధ్యక్షుడిగా నాకు చాలా ఎక్కువ గుర్తింపు వచ్చింది.

ఉపాధ్యక్షులు బోర భారతీదేవి, డా. కొణిదల శోభ కృషి వెల కట్టలేనిది. వయసును కూడా లెక్కచేయకుండా ఆచార్య రాచపాళెం చంద్రశేఖర్ రెడ్డి ఈ సదస్సుల నిర్వహణకు ఎంతో దోహదపడ్డారు. ఇదొక సమిష్టి కృషి.
ప్ర: మీ ఈ ప్రాజక్టులో తెలుగు సాహిత్య ప్రక్రియలన్నింటినీ సింహావలోకనం చేసినట్టుగా భావిస్తున్నారా ?

జ: ఖచ్చితంగా. కవిత్వం, పద్యం, గేయం, కథ, నవల, నాటకం, అన్నింటినీ కలయజుట్టాము. దేన్నీ వదిలింది లేదు. ప్రాచీన సాహిత్యం మొదలు ఉత్తరాధునిక సాహిత్య విమర్శ వరకూ అన్నీ మా కార్యక్రమంలో భాగమయ్యాయి. వ్యాసమూ, స్వీయ చరిత్ర, లేఖా సాహిత్య సదస్సులు చాలా ఆసక్తిగా నడిచాయి.
ప్ర: మీరు సంప్రదించిన అనేక మంది వక్తల వస్తు పరిజ్ఞానం, ఉపన్యాస కళ పట్ల మీ అభిప్రాయం చెప్పండి
జ: అనేక విశ్వ విద్యాలయాల ఉపకులపతులను, పూర్వ ఉపకులపతులను, అనేకమంది ఆచార్యులను, పి హెచ్ డి చేసిన, చేస్తున్న అనేక మందిని భాగస్వాములను చేసాము. కొత్త వక్తలను తయారు చేసాము. వృత్తిరీత్యా విభిన్న రంగాలలో వున్ననూ సాహిత్యం పట్ల అవగాహన, అనుభవం కలిగిన వాళ్ళతో అనేక మంది రచనలపై సమీక్షలు, ప్రసంగాలు, పత్ర సమర్పణలు చేయించాము. అనర్గళంగా సమగ్రంగానే కాక వినూత్నంగా తులనాత్మకంగా విమర్శలు చేసినవారూ వున్నారు. అఫ్సర్, ఓల్గా, ఎన్ గోపీ, జూకంటి జగన్నాథం రచనల చర్చ చాలా ఉత్సాహంగా జరిగింది.

వక్తల సమయ పాలన తో సతమతమయ్యాం. అయితే కవిత్రయం, అష్ట దిగ్గజాలు, అన్నమయ్య, శివారెడ్డి, జాషువా వంటి దిగ్గజ వ్యక్తిత్వాల చర్చ పరిమిత సమయంలో చేయడం దుస్సాధ్యమైన పని అని మాకు బాగా అర్థమయ్యింది. విశేష అనుభవం గల పెద్దలూ, ఇప్పుడిప్పుడే కళ్ళు తెరుస్తున్న వర్ధమాన విమర్శకులూ, సమీక్షకులూ ఇందులో భాగం అయ్యారు. అందరికీ మేము కృతజ్ఞతలు తెలియజేస్తున్నాము. వారి సమయమూ, జ్ఞాన సంపదా మా కార్యక్రమానికి వన్నె తెచ్చాయి.
ప్ర: విప్లవ సాహిత్యం, ముస్లిం మైనారిటీ సాహిత్యాల పట్ల మీరు సరైన కాంతి ప్రసరింపజేయక పోవడం పట్ల మీ సమాధానం
జ: కొలకలూరి ఇనాక్, కత్తి పద్మారావు లాంటి దళిత రచయితల మీద, అలాగే అఫ్సర్, సలీం, వేంపల్లి షరీఫ్, షహనాజ్ బేగం లాంటి ముస్లిం మైనారిటీ కవులపై సదస్సులు జరిపాం. గద్దర్ పై కార్యక్రమాలు నిర్వహించాము. శిలాలోలిత, శీలా సుభద్రా దేవి, కల్పనా రెంటాల వంటి స్త్రీవాద రచయిత్రుల్ని వేదికపైకి ఆహ్వానించాము. దిగంబర కవుల్ని ప్రస్తావించాము. ప్రత్యేక శీర్షిక కింద ఏదీ చేయలేదు గానీ విప్లవ కథ కవిత్వ ప్రస్తావనలూ సమావేశాలు కూడా జరిగాయి. అన్ని రకాల అస్తిత్వాలపై మేము సమ దృష్టితో ఈ కార్యక్రమాన్ని నడిపాము.
అక్షర తోరణం జరుగుతున్న కాలంలో కాలం చేసిన కేతు విశ్వనాధ రెడ్డి, గద్దర్ పై కార్యక్రమాలు నిర్వహించాము. తుమ్మపూడి కోటేశ్వరరావు కన్ను మూయకముందు, తర్వాత సదస్సులు నిర్వహించాము.
సందర్భానుసారంగా జయంతులు, వర్ధంతులు, సాహితీ స్వర్ణోత్సవాలు నిర్వహించాము. ఇందులో భాగంగా కొడవటికంటి కుటుంబరావు, కొండవీటి కవి, తిరుపతి వెంకట కవులు, మధురాంతకం రాజారామ్, మహేంద్ర, చిన్నయసూరి, గురజాడ అప్పారావు, గిడుగు రామమూర్తి, శ్రీ శ్రీ , సినారె, దువ్వూరి రామిరెడ్డి, తుమ్మల సీతారామ్మూర్తి సదస్సులు నిర్వహించాం.
ఇంకా పాపినేని శివశంకర్, రేవూరు అనంతపద్మనాభరావు, అట్టాడ అప్పలనాయుడు, ఆర్వీయస్ సుందరం, మాడభూషి సంపత్ కుమార్, కొండ్రెడ్డి వెంకటేశ్వర రెడ్డి, శిఖామణి, రాసాని, శాంతి నారాయణ, వెంకటకృష్ణ, గంటేడ గౌరు నాయుడు, ఏనుగు నరసింహారెడ్డి, జీవీ పూర్ణచందు, వడ్డేపల్లి కృష్ణ వీరభద్రప్ప, శ్రీరామ్ సాగర్ కవచం, పెరుగు రామకృష్ణ, సబ్బని లక్ష్మి నారాయణ, అన్నవరం దేవేందర్, మువ్వా శ్రీనివాసరావు, అనుమాండ్ల భూమయ్య తదితరుల సదస్సులు నిర్వహించాము. తొలి జ్ణానపీఠ అవార్డు గ్రహీత విశ్వనాథ సత్యనారాయణ సప్తాహం , అవధానములు సైతం నిర్వహిస్తున్నాం.

మహిళామణుల విషయానికొస్తే స్త్రీ వాద రచయిత్రి ఓల్గా, రెంటాల కల్పన, శీలా సుభద్రతో పాటు దాదాపు 40 మంది రచయిత్రులు, కవయిత్రులపై ప్రత్యేకంగా మహిళా పక్షంగా సదస్సులు జరిపాము.
సదస్సులు నిర్వహించడంలో ఎలాంటి ఆంక్షలు, పరిధులు విధించుకోలేదు. గిరి గీసుకోలేదు. అయితే రచనా స్థాయిని బట్టి, సమయాభావ పరిస్థితులను బట్టి ఏ కార్యక్రమాన్ని ఎన్ని నిర్వహించాలేనేది కమిటీ అభిప్రాయాలు తీసుకొన్నాము. 365 రోజుల కార్యక్రమాల్లోనే తమ రచనలపై సదస్సులు నిర్వహించాలని కొందరి నుంచి వత్తిడి, సిఫారసులు వచ్చిన మాట నిజమే.
కానీ ఎవరినీ విష్మరించాలని అనుకోలేదు. రచనా స్థాయిని బట్టి, సమయానుకూలంగా సదస్సులు
జరిపాము. జరుపుతాము. సేవకు కుల, మత, వర్గ, ప్రాంతీయ, జాతీయ భావాలేవీ లేవి. తెలుగు సాహిత్యంలో అన్ని రకాల ప్రక్రియ పట్ల సరైన కాంతిని ప్రసరింప జేయాలన్నదే సేవ ధ్యేయం. దీన్ని ఒక బాధ్యతగా భావించాము. స్వీకరించాము. అదే లక్ష్యం.
ఇప్పటికి సేవ చేసింది గోరంతే. చేయాల్సింది కొండంత.
ప్ర: వర్ధమాన తెలుగు సాహిత్యంలో వస్తున్న కొత్త ముఖాల్ని పరిచయం చేయాల్సినంతగా మీరు చేసినట్టు భావిస్తున్నారా ?
జ: సాహిత్య అకాడెమీ యువ పురస్కారం పొందిన వేంపల్లి గంగాధర్ , వేంపల్లె షరీఫ్, జానీ తక్కెడ శిల, అప్పిరెడ్డి హరినాథరెడ్డి మంత్రి కృష్ణమోహన్ , పసునూరి రవీందర్, పింగళి చైతన్య మానస ఎండ్లూరి, గడ్డం మోహన్‌రావు, బాలసుధాకర్‌ మౌళి, తగుళ్ళ గోపాల్, పల్లిపట్టు నాగరాజు, మెర్సీ మార్గరెట్, అందరు పురస్కార గ్రహీతల్నీ పరిచయం చేశాము. అనిల్ డ్యానీ, పుప్పాల శ్రీరాం, పాయల మురళీ, పెనుగొండ సరసిజ, తండా హరీష్ గౌడ్, సుధా మురళి, కుందుర్తి కవిత లాంటి అనేకమంది కొత్త కుర్రకారు ఈ సదస్సుల్లో మాతో నడవడం మేమెంతో గర్వపడే విషయం.
ప్ర: మీరు మీ కార్యక్రమంలో కవర్ చేయాలనుకుని చేయలేకపోయిన వాళ్ళెవరన్నా ఉన్నారా ?
జ: కుందుర్తి, కాళోజీ, రారా, తిలక్ వంటి హేమాహేమీలపై సదస్సులు చేయాలి. అనువాద సాహిత్యం పై, గేయం, పాట పై చేయాలి. ఇప్పటికి చేసింది సర్వస్వం అనుకోవడంలేదు. ఇంకా అసంఖ్యాక రచనలమీద కార్యక్రమాలు నిర్వహించాల్సిన అవసరం వుంది. ప్రధానంగా చెప్పుకోవాలంటే చలం, అల్లం రాజయ్య, వాసిరెడ్డి సీతా దేవి, రావి శాస్త్రి, శివ సాగర్, చాగంటి సోమయాజులు, దాశరధి కృష్ణమాచార్యులు, రంగా చార్యులు, సురవరం ప్రతాప్ రెడ్డి, సామల సదాశివ, కుసుమ ధర్మన్న, మంగిపూడి వెంకట శర్మ, చిలకమర్తి, ఉన్నవ, పానుగంటి, కట్టమంచి, రాళ్ళపల్లి, పుట్టపర్తి, గడియారం, విద్వాన్ విశ్వం లాంటి వారెందరో మాముందున్నారు. వర్తమాన రచయితలూ వున్నారు. భవిష్యత్తు ప్రణాళికలో ఈ కార్యక్రమాలు రూపుదిద్దుకొంటాయి.
ప్ర: ఈ కార్యక్రమం వల్ల మీరెదుర్కున్న ఇబ్బందులేమన్నా ఉన్నాయా ? వాటినెలా అధిగమించారు ?
జ: మేము ముందుగా ప్రణాళిక వేసుకున్నట్టు వక్తలు రావడం కుదరనప్పుడు యాతన పడ్డాం. అప్పటికప్పుడు మార్పులు చేర్పులు చేయగలిగినా ఒత్తిడి ఉండేది. ప్రసంగం జరుగుతున్నప్పుడు ఒకరిద్దరు మధ్యలో డిస్టర్బ్ చేసేవారు. అడ్మిన్ బాధ్యత చాలా కష్టతరమైనది. శారీరక, మానసిక, ఆర్ధిక వ్యయప్రయాసలు పడ్డాము. కుటుంబం సహకరించక పోతే ఈ పని మేం చేయగలిగేవాళ్ళం కాదు.
రేవూరు అనంతపద్మనాభరావు, పత్తిపాక మోహన్, కొండ్రెడ్డి వెంకటేశ్వరరెడ్డి, మాడభూషి సంపత్ కుమార్, నాగ రాజ్య లక్ష్మి, జంధ్యాల శరత్ బాబు, బీరం సుందర రావు, ప్రవాసీ కార్యదర్శి సత్యా మల్లుల, సంధ్యా రెడ్డి , శివరంజని లాంటి వాళ్ళు ఎందరో ఈ కార్యక్రమాల నిర్వహణకు సమన్వయకర్తలుగా వ్యవహరించారు. పద్మశ్రీ కొలకలూరి ఇనాక్, మండలి బుద్ధ ప్రసాద్, తానా తోటకూర ప్రసాద్, వంశీ రామరాజు సహకారాలు మరువలేనివి.
ప్ర: మీ భవిష్యత్ ప్రణాళికలేమిటి ?

జ: సంవత్సర కాలం, 2600 మందికి పైగా అధ్యక్షులు, అతిధులు, వక్తలు, రచయితలు ప్రధానంగా ఈ సదస్సుల్లో పాల్గొన్నారు. జూమ్ అంతర్జాల వేదికలో వేలాది మంది సాహితీ ప్రియులు పాల్గొన్నారు. సేవ ఆన్ లైవ్ యూట్యూబ్ ఛానల్ ప్రత్యక్ష ప్రసారంలో 8 లక్షల 5వేల మంది వీక్షించగా 28 రోజుల గణాంకాల ప్రకారం సగటున 887 మంది చూస్తున్నారు. 4,527 మంది సబ్స్క్రైబ్ చేయడం జరిగింది.

ఈ కార్యక్రమాలన్నీ ప్రస్తుతం యూట్యూబ్లో భద్రపరచబడివున్నాయి. ఈ ప్రసంగాలన్నీ వివిధ రకాల ఫైళ్లలో sevalive.com మరియు telugue.net వెబ్ సైట్లలో భద్రపరుస్తున్నాము. ఇందులో ఆ యా సదస్సులకు సంబంధించి అందరి పరిచయాలు, చిత్రాలు, వక్తల ప్రసంగాలు – పత్ర సమర్పణలు పొందుపరుస్తున్నాము. ఇదొక పెద్ద రిపాసిటరీ కానున్నది. ఇపుడు ఉన్నత పాఠశాలల్లో ఇంటరాక్టివ్ ఫ్లాట్ ప్యానెల్‌లు (IFPలు) ఇంటరాక్టివ్ కంటెంట్‌ను ఉపయోగించి, బైజుస్ టాబ్స్ కూడా విద్యార్థులకు ఇచ్చి ఆధునిక విద్యా బోధనను అందిస్తున్నారు. ఈ నేపథ్యంలో పాఠశాల విద్య కమీషనర్, ప్రిన్సిపాల్ సెక్రెటరీ దృష్టికి మా కార్యక్రమాన్ని తీసుకెళ్లి పిల్లలకి తెలుగు సాహిత్య పరిచయం చేయాలని పని చేస్తున్నాం. బాల సాహిత్యంపై అవగాహన కల్పిస్తూ నిష్ణాతులైన సాహితీ ప్రముఖులతో ఆన్ లైన్ శిక్షణా తరగతులను నిర్వహించే ఏర్పాటుకు కృషి చేయాలనుకొంటున్నాము. ఇంకా పాఠశాల, కళాశాల స్థాయిల్లో తెలుగు సాహిత్యంపై శిక్షణా తరగతులను రాష్ట్ర ప్రభుత్వ సహకారంతో మొదట జిల్లా స్థాయిలో ఏర్పాటు చేయాలనుకొంటున్నాము.
– శ్రీరామ్ పుప్పాల
9963482597

మహనీయుల విజయగాథలు తెలుసుకొని మారాల్సిన అవసరం ఉందని గుర్తించారు మేధావులు. ఈ కోవలో ఐన్‌స్టీన్ ప్రతిపాదించిన ‘ప్రత్యేక సాపేక్షతా సిద్ధాంతం’ ఇదే! కాంతికంటే వేగంగా ఏదీ ప్రయాణించలేదని, అది ఎప్పుడూ స్థిరంగానే ఉంటుందని ఐన్‌స్టీన్ గుర్తించాడు.
న్యూటన్ కాలాన్ని ఒక నదీ ప్రవాహంగా భావించాడు. అది వింటిని వదలిన బాణంలాగా గతం నుండి వర్తమానం గుండా భవిష్యత్తు వైపుకు అవిచ్ఛిన్నంగా, ఏక రూపంగా ప్రయాణిస్తుందనీ, దాని గతి ఏ కారణంగానూ మారదని చెప్పాడు. కానీ ఐన్‌స్టీన్ కాలమనే నదీ ప్రవాహం ఏకరీతిగా సాగదని, గ్రహాలూ, నక్షత్రాలు, గెలాక్సీల వంటివాటిలో సమక్షంలో అది వంపు తిరుగుతుందని, వాటి చుట్టూ కాలం వేగంగా సాగడమో లేక నిదానంగా సాగడమో జరుగుతుందని తెలిపాడు. సముద్రంలో ఈదే చేప తన చుట్టుప్రక్కల వున్న నీటిని ఎలా వెనక్కి నెడుతుందో అలాగే ఒక నక్షత్రము లేదా తోకచుక్క లేదా గ్రహము తను ప్రయాణించే అంతరిక్షంలో దాని దిక్కాలలో మార్పును తీసుకువస్తుంది. దిశ, కాలాలు వేర్వేరు కావు. అవి ఒకటి లేకుండా ఒకటి మనలేవు అని ఐన్‌స్టీన్ నిరూపించారు.

మనం చూస్తున్నవాటిల్లో కొన్ని ఎన్నడూ మారనట్లు, నిత్యం తెల్లవారడం పొద్దుకుంగడం, సూర్యోదయం, సూర్యాస్తమయం గమనిస్తాం. కొండలు సముద్రాలు అలాగే వుంటాయి. కాని మనం మాత్రం మారుతుంటాం. పుట్టుక, పెరుగుదల, మరణం మార్పులో భాగమే. అలాగే కొన్ని వస్తువులు తుప్పుపడుతుంటాయి. మరికొన్ని శిథిలమవుతుంటాయి. మారనిది అంటూ ఏదీ లేదు. ఎంతసేపట్లో మారతాయనేదే ప్రశ్న. మార్పుకు పట్టే కాలాన్ని బట్టి కొన్ని అసలు మారనట్లే అన్పిస్తాయి. మార్పుతో ముడిపడి కాలం వున్నది. మనం దీనినే గతం, వర్తమానం, భవిష్యత్తు అని విభజించాం. భౌతిక విజ్ఞానం గతం- భవిష్యత్తునే పేర్కొంది. కాలాన్ని విడిగా చూచిన తీరును ఐన్‌స్టీన్ మార్చేసి, కాలం ప్రదేశం కలిపేడు. ఈ ప్రపంచలో ఎన్నో వస్తువులు ఉండగా వాటిలో మార్పులు వివిధ రకాలుగా కనిపిస్తున్నవి. సైన్సులోని భిన్న శాఖలు ఆయా రంగాలలోని మార్పుల్ని అధ్యయనం చేసి చెబుతున్నాయి.

ఒకప్పుడు న్యూటన్ ప్రపంచంలో వున్న మనం ఇప్పుడు ఐన్‌స్టీన్ విశ్వంలో అడుగుపెట్టాం. మన భావాలెన్నో మార్చుకోవలసి వస్తుంది. ఖగోళ శాస్త్ర పరిశోధనలు మన సంప్రదాయ ఆలోచనల్ని పూర్తిగా మార్చివేస్తున్నాయి. మార్పు పరిణామంలో ఆధునిక భావాలు ఏర్పడ్డాయి. ఆ క్రమంలో మనమూ మారుతున్నాం.. మారాలి.. మార్పు కోసం మారాలి. వివేకంతో ఎవరైతే మారగలరో వారే అత్యుత్తమ ఫలితాలతో ఘనవిజయాన్ని సాధిస్తారు. మారకపోతే మాత్రం జీవితంలో వారి ఎదుగుదల వుండదు. ఈ సమాజంలో తెలివైనవారుగా గుర్తింపు పొందరు. లేదంటే, గొంగళిపురుగుగా మారుతారు ఎక్కడి గొంగళి అక్కడేలా.. అదే మార్పు వైపు అడుగులు వేస్తే గొంగళిపురుగు దశనుంచి సీతాకోక చిలుక చందాన పరిణామం చెందుతారు. ఉజ్వల భవిష్యత్తును చవిచూస్తారు.
నాటినుంచి నేటివరకు తెలివైనవారు ఎందరో మారడానికి ప్రయత్నిస్తూనే ఉన్నారు. కాలచక్రంలో, మారుతున్న కాలంతో, ఎన్నో ఎనె్నన్నో మార్పులు వచ్చాయి. మానవ జీవితాల్లో వెలుగులు నింపడం కోసం వందసార్లు విఫలమైనా పట్టువదలని విక్రమారుడిలా మార్పులు చేస్తూనే, చివరికి తన మేధోసంపత్తితో థామస్ అల్వా ఎడిసన్ బల్బును కనుగొన్నారు. విద్యుత్ కనుగొన్నందున జీవనశైలి మారింది. ఇలా ఒకటేమిటీ ఎన్నో మార్పులు వచ్చాయి… వస్తున్నాయి.. ఇంకా వస్తాయి. తెలివితేటలతో మార్పుకోసం పయనిస్తే మన జీవన విధానంలో ఇంకా అనేక మార్పులు కూడా చోటుచేసుకుంటాయి.
ప్రపంచంలో మార్పులు రావాలని, మార్పులు తీసుకురావాలని ఎనె్నన్నో చెబుతారు. కానీ తనదాకా వచ్చేసరికి దాన్ని ఆచరించరు. మార్చగల సామర్థ్యం ఒకరి తెలివితేటలను నిర్ణయిస్తుందనేది పచ్చి నిజం. మార్పు గొప్ప గుణం. మార్పును స్వీకరించగలిగితే ఏదైనా సాధించవచ్చు. మార్పు రావటం అనేదే తెలివితేటలకు నిదర్శనం. విజయం అనేది అంత సులభం కాదు. కష్టపడితేనే వస్తుంది. తన భవిష్యత్తును చక్కగా తీర్చిదిద్దుకోవాలంటే తన ఆలోచనలను, అలవాట్లను దృక్పథాన్ని మార్చుకోవాలి. పట్టుదల, కృషి వుంటే మార్పుతో అసాధ్యం కూడా సుసాధ్యం అవుతుంది.
నిన్నటిరోజు ఈ రోజు రాదు. అలా వుండదు. కాబట్టి మార్పు అవసరం. మార్పుకు అనుగుణంగా మారాలి. ఈ ప్రపంచంలో ఏదీ శాశ్వతం కాదు. ఒక్క మార్పు తప్ప. కాలక్రమంలో ఈ మార్పులను గుర్తించినవాడే చార్లిస్ డార్విన్. ఆధునిక జీవశాస్త్రంలో డార్వినిజం చాలా మార్పు తెచ్చింది ఆయన జీవ పరిణామ సిద్ధాంతమే భూమిమీది జీవుల పరిణామక్రమాన్ని తెలియజేస్తుంది. భూమిపై జీవజాలం ఏ విధంగా పరిణామక్రమం చెందాయి అనే విషయంపై పరిశోధనలు చేశాడు. జీవపరిణామ సిద్ధాంతాన్ని వర్ణించాడు.
బాబాసాహెబ్ అంబేద్కర్, సర్వేపల్లి రాధాకృష్ణన్, అబ్దుల్ కలామ్ లాంటివారు ఎందరో మార్పుకోసం పాటుపడినవారే. ఇలాంటి మేధావుల విజయగాథలను స్ఫూర్తిగా తీసుకొని మనం మారుతూ.. మారుకోసం కృషి చేస్తూ తెలివైనవాడిగా సమాజంలో గుర్తింపు పొందుతారు.
అభివృద్ధి సాధించాం అంటే.. మార్పు కోరుకోవటమే. ఇపుడు అన్ని రంగాలలోనూ అనేక మార్పులు వచ్చాయి. నాటి తాళపత్ర గ్రంథాల స్థాయి నుంచి పుస్తక ప్రతుల స్థాయికెదిగి తాజాగా అంతర్జాలం వరకు మార్పు చోటుచేసుకొంది.

నేటి సమాజంలో మార్పు రావాలంటే ముందు మనం మారాలి. మన ఆలోచనలు మారాలి. మన ఇంట్లో ఉండేవారు మారాలి. మన చుట్టూ ఉండేవారు మారాలి. ప్రతిఒక్కరిలో మార్పు రావాలి. అప్పుడే సమాజంలో మార్పు వస్తుంది.
మార్పు అనివార్యం. అదే తెలివైనవాడి లక్ష్యం. ఆ లక్ష్యం ఏర్పడాలి. ఆ లక్ష్యమే తెలివైనవారిగా తీర్చిదిద్దుతుంది. అందుకే అందరిలో మార్పును కోరుకుందాం. మారగలిగే సామర్థ్యమే తెలివితేటలకు కొలబద్దగా నిలుద్దాం!

– కంచర్ల సుబ్బానాయుడు